Föstudaginn 5. október sl. fór fram doktorsvörn í næringarfræði við Matvæla- og næringarfræðideild á Heilbrigðisvísindasviði Háskóla Íslands. Þá varði Tinna Eysteinsdóttir doktorsritgerð sína „Næring á lífsleiðinni og beinheilsa aldraðra. – Mat á gildi spurningalista um neyslu á mismunandi æviskeiðum og tengsl mjólkur- og lýsisneyslu á lífsleiðinni við beinheilsu aldraðra“.
Andmælendur voru dr. Björn Guðbjörnsson gigtarlæknir og prófessor við Læknadeild Háskóla Íslands og dr. Elisabet Rothenberg, næringarráðgjafi við Sahlgrenska sjúkrahúsið í Gautaborg og lektor við Háskólann í Gautaborg.
Leiðbeinendur voru dr. Laufey Steingrímsdóttir, prófessor við Matvæla- og næringarfræðideild og dr. Inga Þórsdóttir, prófessor við Matvæla- og næringarfræðideild.
Ágrip úr rannsókn
Markmið rannsóknarinnar sem doktorsritgerð þessi byggir á var að auka þekkingu á mikilvægi næringar á mismunandi æviskeiðum fyrir beinheilsu aldraðra, með áherslu á mjólkur- og lýsisneyslu.
Fáar rannsóknir hafa beinst að gildi aðferða til að meta mataræði aldraðra, hvort sem um er að ræða núverandi mataræði þeirra eða fæðuvenjur fyrr á lífsleiðinni, en slíkar rannsóknir eru mikilvægar svo rangar ályktanir séu ekki dregnar um samband mataræðis og heilsufarsþátta. Spurningalisti var sérhannaður fyrir Öldrunarrannsókn Hjartaverndar um mataræði þátttakenda á unglingsárum (14-19 ára), á miðjum aldri (40-50 ára) og núverandi mataræði. Í fyrri hluta þessarar rannsóknar var gildi spurninga um mataræði á miðjum aldri og um núverandi mataræði metið, og reyndist listinn hæfur til að raða einstaklingum eftir neyslu margra mikilvægra fæðutegunda, þar á meðal mjólkur- og lýsisneyslu.
Í seinni hluta rannsóknarinnar var samband beinþéttni í mjöðm á efri árum og mjólkur- og lýsisneyslu á mismunandi æviskeiðum kannað meðal þátttakenda Öldrunarrannsóknarinnar. Mjólkurneysla á lífsleiðinni tengdist hærri beinþéttni á efri árum og voru sterkustu tengslin fyrir mjólkurneyslu á miðjum aldri en síðri á öðrum aldursskeiðum. Minni tengsl voru milli lýsisneyslu og beinþéttni, og fannst marktækt samband einungis við núverandi lýsisneyslu kvenna.
Niðurstöðurnar hvetja til frekari rannsókna á gildi næringar á lífsleiðinni fyrir beinheilsu aldraðra, en með aukinni þekkingu má þróa og efla forvarnir sem geta bætt heilsu og aukið lífsgæði á efri árum.
Auk leiðbeinenda var dr.Ingibjörg Gunnarsdóttir, prófessor við Matvæla- og næringarfræðideild, í doktorsnefnd.
Tinna Eysteinsdóttir er fædd 1983. Hún lauk BS prófi í líffræði frá Háskóla Íslands árið 2006 og MS prófi í næringarfræði frá Háskóla Íslands 2008. Tinna hóf doktorsnám í næringarfræði haustið 2008.
Tinna hefur verið stundakennari við Háskóla Íslands og komið að fjölda annarra rannsókna og verkefna hjá Rannsóknastofu í næringarfræði frá árinu 2007.
