Ágætu félagar og áhugafólk um beinvernd,
Til hamingju með 20 ára afmælið!
Landsamtökin Beinvernd voru stofnuð formlega 12. maí 1997. Ólafur Ólafsson, þáverandi landlæknir, var aðal hvatamaðurinn að stofnun þeirra. Á þeim tíma var að koma í ljósi ný þekking um að hægt væri að draga úr beinþynningu og afleiðingum hennar, beinbrotunum, með æskilegum lífsháttum. Þess vegna væri nauðsynlegt að upplýsa fólk á markvissan hátt um mikilvægi góðrar næringar og hreyfingar.
Megin markmið félagsins eru og hafa alltaf verið:
# Að vekja athygli almennings og stjórnvalda á beinþynningu sem heilsufarsvandamáli.
# Að efla fræðslu meðal almennings og heilbrigðisstétta um beinþynningu og varnir gegn henni.
Hægt er að skilgreina beinþynningu sem sjúkdóm í beinum sem einkennist af lágum beinmassa og örbreytingum á uppbyggingu beina, sem hefur í för með sér að styrkur beinsins er minni og þar með eru meiri hætta á beinbrotum. Það getur verið erfitt að mæla þessar örbreytingar og því er það oft þannig að beinþynning uppgötvast ekki fyrr en við fyrsta brot. Það er því mjög mikilvægt að þeir einstaklingar sem brotna við lágorkuáverka fái frekara mat m.t.t. beinþynningar. Með nýju verklagi, Grípum brotin, sem verið er að koma á á Landspítalanum er stefnan að finna þessa einstaklinga og koma þar með í veg fyrir annað brot.
Beinþynning er sjúkdómur sem hefur alltaf verið tengdur við eldri einstaklinga enda koma afleiðingar hans yfirleitt fram á eldri árum. Mikilvægt er þó að átta sig á því að forvarnir vegna beinþynningar þurfa að byrja miklu fyrr. Beinmassi okkar nær hámarki um tvítugsaldurinn og því skiptir miklu máli að fræða yngri kynslóðina um beinþynningu og forvarnir. Hreyfing og góð næring fara þar í fararbroddi.
Á síðustu 20 árum hafa Landsamtökin Beinvernd vaxið og dafnað. Flestir landsmenn er meðvitaðir um mikilvægi kalks, D-vítamíns og hreyfingar fyrir beinin. Þar á fræðslustarfsemi Beinverndar stóran þátt en Beinvernd hefur gefið út fjölda bæklinga og fréttabréfa og hægt er að nálgast slíkt efni rafrænt á vefnum www.beinvernd.net. Þar er einnig að finna mikinn fróðleik um beinþynningu, greiningu og meðferð, áhættureikninn BEINRÁÐ og alþjóðleg próf um áhættu á beinbrotum. Beinvernd hefur frá upphafi verið aðili að alþjóða beinverndarsamtökunum IOF (International Osteopororis Foundation) og hefur tekið virkan þátt í alþjóðlegu beinverndarstarfi. Þess má geta að tvisvar sinnum hefur félagið fengið viðurkenningu frá IOF fyrir framsækið starf!
Það er ósk formanns að næstu 20 ár Landsamtakanna Beinverndar verði jafn afkastamikil og gæfurík. Þau markmið sem lagt var upp með við stofnun samtakanna eiga svo sannarlega enn við í dag.
