Frá ritstjóra,
Fréttabréf Beinverndar kemur nú í annað sinn út á rafrænu formi. Prentuð fréttabréf voru gefin út einu sinni til tvisvar á ári í samfellt 10 ár eða frá árinu 2002 til ársins 2012. Ekki var gefið út fréttabréf árið 2013 en árið 2014 var tekin upp sú nýbreytni að gefa fréttabréf Beinverndar út á rafrænu formi. Segja má að það sé tímanna tákn að fréttabréfin séu orðin rafræn en Beinvernd, eins og aðrir, þarf auðvitað að vera þar sem fólkið er, til að koma skilaboðum sínum á framfæri. Skilaboðin sem Beinvernd kemur á framfæri við þjóðina eru nefnilega þess eðlis að þeim verður aldrei að fullu komið til skila. Þá á ég við að þau þarf að endurtaka og rifja upp með reglulegu millibili til að þau falli ekki í gleymsku. Mismunandi æviskeið krefjast mismunandi nálgunar. Unga fólkið þarf að vita hvernig það nær að byggja upp sem mestan beinmassa. Fullorðnir þurfa að þekkja hvernig má viðhalda beinmassanum og aldraðir þurfa að kunna leiðir til að hægja á hinu náttúrulega beintapi sem verður á því æviskeiði.
Það er þrennt sem segja má að séu lykilatriði þegar kemur að því að halda góðri beinheilsu en það er þungaberandi hreyfing, kalkneysla og D-vítamín inntaka. Kalk fæst auðveldlega úr fæðunni, s.s. mjólkurvörum og dökkgrænu grænmeti. D-vítamín fæst úr sólarljósi en einnig úr lýsi og feitum fiskafurðum. Á þessum árstíma, þegar dagurinn er hvað stystur, er því full ástæða til að minna sérstaklega á lýsið. Þungaberandi hreyfing er t.d. hlaup og lyftingar og ánægjulegt er að sjá hve stór partur af þjóðinni er duglegur að hreyfa sig, sumar sem vetur. Höldum því áfram og fáum fleiri með okkur því betur má ef duga skal.
Eyrún Ólafsdóttir
