5 / 8
www.beinvernd.is
5
Jakob Jóhann
Sveinsson
sundmaður
Hvar og hvenær ertu fæddur?
Ég er fæddur í Reykjavík árið 1982.
Hvar ólst þú upp og í hvaða skólum hefur þú verið?
Ég ólst upp í Breiðholti og má segja að ég hafi alla tíð verið
í Breiðholtinu. Var í leikskóla í Seljahverfi og í Seljaskóla og
seinna meir fór ég í Fjölbrautarskólann í Breiðholti.
Hvenær byrjaðir þú að æfa íþróttir og varð sundið strax aðal
íþróttin þín?
Ég byrjaði að æfa fótbolta þegar ég var 5 ára en fór að æfa
sund þegar ég var 9 ára. Ég ætlaði alltaf að halda áfram í
fótboltanum en svo varð ég bara betri í sundi og eignaðist fullt
af góðum vinum og hélt því áfram í sundinu.
Hvað æfir þú mikið og hvernig var undirbúningi fyrir
Ólympíuleikana háttað?
Ég æfi oftast sund tvisvar sinnum á dag, á hverjum degi
nema á sunnudögum (nema þegar það er keppni) og
svo gerir maður þrek eða lyftingar á hverjum degi. Fyrir
ólympíuleikana var mikið um æfingaferðir til Evrópu, enda var
landsliðið í 10 vikur á ferðalagi í sumar.
Er það taugatrekkjandi að þurfa að ná ólympíulágmörkum til
að komast inn á leikana?
Það var mjög taugatrekkjandi í ár, enda vissi ég ekki hvort ég
væri að fara fyrr en þremur vikum fyrir Ólympíuleikana.
Hversu miklu máli skiptir mataræðið fyrir afreksíþróttafólk?
Það skiptir mjög miklu máli. Maturinn er eins og bensín fyrir
bílinn og það er best að vera með gott bensín svo vélin gangi
vel. Það má því segja að þú verði að borða hollt og gott til að
líkaminnn sé í góðu lagi.
Hvernig hagar þú þínu mataræði?
Ég reyni að borða eins mikið og ég get og helst 6x til 7x á
dag, en án þess þó að borða sætindi eða sælgæti. Ég verð að
borða mjög mikinn mat til að hafa orku í æfingarnar.
Hefur þú alltaf gætt þess vel að borða hollan og góðan mat,
líka á unglingsárum?
Já ég byrjaði að hugsa um mataræðið þegar ég var í 8. bekk.
Þetta var rosalega erfitt í byrjun, enda þurfti ég að skrifa niður
hvað ég ætlaði að borða í hverjum frímínútum. Ég þurfti að
skipuleggja mig vel í byrjun en eftir smá tíma var þetta orðið
ósjálfrátt og núna veit ég nokkurn veginn hvað ég þarf til að
halda mér gangandi.
Hverjar eru fyrirmyndir þínar?
Bróðir minn. Leit mjög upp til hans þegar ég var yngri. Hann
var ekki í mikið í íþróttum en honum gekk vel og maður lítur
alltaf upp til hans, en fólk á að líta í kringum sig og sjá alla
þá sem þar eru, allir vinirnir. Það er margt sem þú getur lært
af þeim sem eru í kringum þig. Allir eru góðir á einhverjum
sviðum og þú getur lært af þeim, til að verða ennþá betri á því
sviði sem þú ert ekki góð/ur í.
Hverjir eru helstu áhrifavaldar þínir?
Ætli það séu ekki vinir, fjölskyldan og þjálfarar, því án þeirra
væri ég ekki sá sem ég er í dag.
Stuðningur hlýtur að skipta miklu máli, hvaðan færð þú
stuðning þinn?
Fjölskylda mín og vinir styðja mig ótrúlega mikið. Svo á ég
mér mjög góða styrktaraðila sem hafa hjálpað mér að brúa
bilið svo ég geti keppt og æft hérlendis og erlendis án þess að
hafa of miklar áhyggjur af fjárhagnum, eins og MS, Saffran,
Altís, World Class, Hreysti, Jónar Transport, Íslandsbanki og
Aquasport.
Lífið eftir Ólympíuleikana, hvað ertu helst að fást við núna?
Núna er ég bara í dálitlu fríi frá keppni en held mér við með
því að prófa aðrar íþróttir. Svo er ég í verkfræðinámi í Háskóla
Íslands.
Framtíðarplön?
Mig langar að flytja erlendis og þá helst til Ástralíu eða Nýja-
Sjálands, vinna þar og fara í meira nám.
Hefur þú þurft að færa miklar fórnir til að ná svona langt í
sundinu?
Ég myndi ekki segja að ég hafi fórnað neinu fyrir sundið. Ég
valdi sundið og ákvað að leggja mig allan fram í því.
Ætlar þú að halda áfram að keppa í sundi?
Já að sjálfsögðu. Mér finnst þetta ennþá mjög gaman og
ennþá líður mér vel í vatni.
Hver eru skilaboð þín til ungu kynslóðarinnar, bæði þeirra
sem stefna á Ólympíuleika og hinna?
Æfið mikið, og lærið vel í skólanum og betur en þeir sem eru
i kringum ykkur, borðið holla fæðu og farið snemma að sofa.
Þá mun ykkur ganga vel.
Skilaboð til þeirra sem eldri eru?
Gerið það sem ykkur finnst skemmtilegt og gefist aldrei upp á
draumum ykkar.